उत्प्रेरक सायरी वा मुक्तकहरु

वर्तमानमा भविष्य देख्नु छ अब
चन्द्रमामा पाइला टेक्नु छ अब

विगतलाई सम्झी पीर मान्नु छैन
सुनौलो भविष्य लेख्नु छ अब ।।




फूलको झैँ सुगन्ध कुनै झारमा हुन्न बुझौँ
जीवनको वास्तविक ज्ञान संसारमा हुन्न बुझौँ

लेखेको पाएँ भन्दै पाइला रोक्नेहरु
याद राख, कसैको भाग्य निधारमा हुन्न बुझौँ ।।

    
       

याद राख चट्टान पनि गाल्न सक्छु म
हावामा नि पाइला चाल्न सक्छु म

सोचसँगै जिन्दगी बद्लियो मेरो
पानीले पनि आगो बाल्न सक्छु म ।।




कसले भन्छ यो जिन्दगी हार बन्नेछ ?
पृथ्वीलाई अनायसै भार बन्नेछ ?

सबैमा शंका उब्जाउने जीवन
हेक्का राख एकदिन चमत्कार बन्नेछ ।।




राजनीतिले निराशा सधैँ छरेर हुँदैन
जनताहरु नै उठ्नु छ अब डरेर हुँदैन

भ्रष्टाचार मारौँ, अन्याय फालौँ, विकास गरौँ है
विकासको निम्ती मात्रै सपूत मरेर हुँदैन ।।




सकारात्मक सोच र महान विचार भर्दछु तिमीमा
त्यो जोश र जाँगर, उत्साह र उमङ्ग छर्दछु तिमीमा

ति पाइला अघि बढ्न सकुन्, शिखर चढ्न सकुन्,
जिन्दगीको शुभकामना व्यक्त गर्दछु तिमीमा ।।